مراد , مرادهُ

موضوع: مراد , مرادهُ 2010-10-21, 17:46

قصّتنا قصّة قصيره
وفيها نصيحه لاشخاص عقوله صغيره
بس انا عقلي كبير وفي روحي مش شكيره

قصّتنا تحكي عن شاب
في التسنكيح بالسيّارة عجب العجاب
وللفلايط مهوش داير حجاب

اسمه العيّل مراد
وفي القياده امشّيها عناد

هدَا الشّاب الصغير
للسيارة سواق كبير
وربّك امنجّيه من كم رقدة سرير

يتسنكح في كل مكان في البال
يومياً وعلي نفس المنوال

ياريته امغير يخدم علي حاله
امطلّع الجنيه ونص من باله
وفي رحمة الوالدين ايحقق العداله
علي امل ان ربّي ايكفرله عن افعاله

وفي يوم من الايّام
انطلقت من رأسه افكار كالسهام
/ليش مالواحد يحسبها تمام

ويتسنكح تلا مدرسة بنات
علي امل ايحصل اشويه نظرات
..

فدَهب الي الخنساء الثانويّه
و نابش كل البنات : يا نا عليّا
وتسلميلي يا ابنّيه

الي ان اكملت المرواحه
فقال خليني انكمّل برمتي قبل الاستراحه

فجري بأقصي سرعه في الشوارع الفرعيّه
ولف من احد الكورفات بسرعه 100
فأرتطم بسيّارة اتسوق فيها ولّيه

نزلت الوليّه ونزل بعدها هو
ما قال لا لاباس ولا باخدَ السو

نزل ونظر الي سيارته
والبراكوربي ظربه بكندرته

والوليه يا عيني سيّارتها راحت فيها
وسيّارة مراد حتّي ختشه مافيها

سبحان الله ,, علي ما فعله وسوّاه

الوليه راكبه معاها وحده عينها بارقه
طلعت بنّينه وكتبت رقم الطارقه

ومراد سكنتله الولّيه تبي اوراقه
وهو بحسن نيّة عطاها البطاقه
وفجأة جاء من بعيد مصري ايقوقح ورافع ساقه

وقال : ايه يا عم . ديه مرات الحق سعيد علي سن ورمح
حج شرّاي ووشّه سمح

مراد هزّب المصري وركب فيه لز
وكل شاب من المنطقه جاي ايحز

:::::::::::::::::::::::::::::::::::
الي اللقاء في الجزء الثاني ...

موضوع: رد: مراد , مرادهُ 2010-10-21, 17:52

قوية بكل يا اليوفي

في انتظار الباقي

موضوع: رد: مراد , مرادهُ 2010-10-22, 14:30

لازم يعني تخلينا نرجوا للجزء الثاني

شوقتنا يا اليوفي

في الانتظار

موضوع: رد: مراد , مرادهُ 2010-10-22, 23:37

شكرا ساكورا وتامي
cheers

موضوع: رد: مراد , مرادهُ 2010-10-23, 19:23

امممممم شن حي صير فيه مراد
خليها نهايه غير متوقعه ياليوفي
و في انتظار الجزء الثاني

موضوع: رد: مراد , مرادهُ 2010-10-23, 20:12

بجد يوفي عندك ابداع

بس متطولش بصراحة الواحد ينسجم معاهن