كان يا ما كان في قديم الزمان
كان في واحد ,ملك في السكنان
اسمه العيّل شهاب
لاهو بلعوط ولا حتّي كذّاب
شهاب حشيشته العمل
ايجيبله في فلوس خير من الملل
كان يخدم في مصنع
وملقبينه ,,بشهاب الاصلع
لأن ديما صلعته تلمع
في يوم من الايام
شهاب روّح من المصنع وطاح عالسرير ونام
ومن التعب والتلف ,,خش بسرعه في عالم الاحلام
حلم ,انّه قاعد في وسط غابه
والسما صافيه مفيهش اي سحابه
والغابه مليانه ازهار
وفيها بحيرات وانهار
وفيها من كل الخيرات
فواكهً كان ام خضروات
شهاب تفاجأ بالمنظر الجميل
ودعا ربّه ان الحلم يقعد طويل
وتما ايتمشي وهو فرحان
وفي نفس الوقت حس روحه انّه ثقلان
وكل ما يمشي كل ما ايحس بالثقل
وقال في سرّه :بلاآآ الثقل هظا اشر من تعب العمل
لكن والله مني واعي توّا
خليني انتمشي وانخش في الغابه جوّا
وقعد يمشي وايكر في روحه كر
لين ما جاع وعطش وقطعه الشر
ومن العطش عدّي يشرب
طبّس عالميّه لقا منظر مرعب
شاف روحه في مراية النهر
انّه راسه فيه شعر
شعر واجد من الزنقيره لعند الظهر
شعر واحد محلّقش له كم شهر
شهاب فرح من المنظر وانسر
وقال خلّيني انبلّه وانشبّيه
وعلي كل الناس انفشّك بيه
و من الفرحه كب علي شعره امّيه
وفجأه سمع صوت وليّه
بصوت عالي ::اوعي يا ليييد
اوعي من النوم يا بلييد
وعا من السرير راقيله
وعا ورافع مساقيله
بحّت لقا امّه اتوعّي فيه
و كرّت الغطا من عليه
وقال لها : خلّيني نحلم خلّيني
يا أمي عليش وعّيتيني
والام اتهزب فيه : اوعي ياالاصلع
تأخرت يا شهاب عالمصنع
شهاب وعا و راسه امصدّع
ومهوش امصدّق كلمة اصلع
وبحّت في المرايه وانبهر
ملقش في راسه ايّ شعر
ومن شكله انفجع
وراقيله من حلمه اللي انقطع
وقال في سرّه مازال في امل
خلّيني نوعي وانعدّي لعمل
وكالعاده شرب حليبه وشاهيّه
وعزق الكناسه في البتّيه
وعدّا للمصنع علي طول
شهاب حيقعد طول النهار مشغول
ونبّي ننصح شهاب وانقول
:ليس كل من لهو شعر ,بــلبــبول
وهيّا اتشاآآآو
