الايام مسرع ما تمشي والحياة تمّت مملّه
مفيش مفاجئات والوقت ايعدّي كلّه
حياتنا فاضيه من جوّا كيف السلّه
كحّه وامراض وجسم علّه
اوكال واطياح عالشوكات
قرمه وبلوتوث ونقّالات
تفنيص في الناس وعدم رد سلامات
والعنصر الاساسي منابشة البنات
خشّوا عالدخان وخشّوا عالشيشه
جوهم تمام ما ناقص الا حشيشه
حياتهم بلا هدف حياتهم درويشه
ملهاش ايّة قيمة وتمّت كيف الريشه
يائسين من الدنيا وفاكّين من الامل الفيشه
اطياح قهاوي وتدخين امعسّل
معندكش فلوس ما عندك ما اتنزّل
شعرك واجد وامقمّل
بنتك شينه مش عارف كيف متحمّل
مر عليه العمر وعاف عليه الزمان
الكل ايتقدّم وهو قاعد في نفس المكان
لا قرايه لا شهاده
مش عارف كيف بيخدم بلاده
عالة علي المجتمع وعاله علي الشباب
معندش اي فرصه متسكره في وجه الابواب
ايتمنّي لو عنده من الدنيا فرصة انسحاب
معندش اي تدبير وتفكيره فيه التهاب
حياته مقفوله وما لقالهاش حل
عجز عن كل شئ ومن الدنيا مل
انا نحكي عن جزئيه ومنحكيش عن الكل
:::::::::::::::::::::::::::::::::::::::::::
نصيحتي للشباب:
سقدوا ارواحكم
راهو وحش البطاله جاكم
قاعد ايراجي فيكم تلقاه قاعد وراكم
بطاله يا عليك حاله انخشوا علي البرويطا والباله
ســــــــــــــــــــلا م