عـن العـرس عـلى الطريقة الليبية! البداية : إرسال كروت العزومة إلي اكبر عدد ممكن من المعارف والأصحاب والجيران وجيران الجيران ، لكي تتباهي أم العريس / العروس بالزحمة ، وبعدين أتقول والله ما عزمت فيت الأقارب والجيران بس مش عارفه منين جوا .
أهل المناسبة : التجهيز للمناسبة قبل سنة أو أكثر ويقولوا الوقت زرنا شراء كل ما يلزم وما لايلزم - حسب القول المعروف أيزيد خير ما ينقص العريس / العروس مكشر وضايقه في وجهه – عادة لازم منها- الحوش حايس والعيل الصباي ماشي أيجيب في سيارة السيارة مش للزفة – للمجاري الفايضة – أم العريس / العروس رابطة رأسها مريضة الطباخة جت وين اللحم ؟ من مشا ايجيب فيه ؟ عدي لجارتنا وجيب منها منصب وطنجرة كبيرة عدي لجارتنا وجيب منها بمبة غاز اهي جارتنا جت- علشان ايشوفوا غيرها – قبل المغرب سكون - كل شئ عدي للصالة – من ايجيب البنات من الكوافير – دوركان لقيت – من في الحمام كنا معش طلع بقدرة قادر الكل في الصالة – الحوش امشرع - صالة الأفراح هي المكان القام به المناسبة سواء حنه او زفة ( عيد ميلاد او لمة اجياب )
المعازيم : الحضور بدري بيش أتحصل مكان قدام الجلوس بطريقة ذكية بيش يشوفوا لبستها فتح واكل كل شئ موجود علي الطاولة اللي ما تقدرش عليه تأخذه في منديل ازعمك وين ديرينها هذى – توا نسأل أخته – الفرقة تصول وتجول توا انجي نمشي انسلم – بالكي ما شفوش لبستها كويس – كنها افلانة لابسة هكي شنوا صايرلها ترفع يدها تشير الي صحبتها – بيش ايبان الذهب – توا انجي نمشي للحمام – في وحدين جو توا بيش ايشوفوها – العريس / العروس طول باهي مع السلامة تروح بدون ما تشوف العريس – حسرة – الحالة خارج الصالة : العيال تجري – الأب يجري وراه - العيال جعانة – الأب يدز ولامن مجيب - العيال نعسانة – اشويه قريب انروحوا - العيال ارقدت – وين امفاتيح السيارة -
الخلاصة : راح فيها العيل وبات العيل كل شئ عالبركة – ثاني يوم – وكل واحد ايروح لحوشة ودور من ايضملك حوشك
